၁၄ ကြိမ်မြောက် အင်္ဂလိပ်ဘာသာ သင်ကြားရေး နှီးနှောဖလှယ်ပွဲတွင် ဦးဆောင်ဆွေးနွေးမည့် မြန်မာနိုင်ငံသား အင်္ဂလိပ် ဘာသာ သင်ကြားရေး ပညာရှင်များအား ဖိတ်ခေါ်(ကေတီ)
နှစ်စဉ် ကျင်းပမြဲဖြစ်သော ဗြိတိသျှကောင်စီ (မြန်မာ)၏ အင်္ဂလိပ်ဘာသာသင်ကြားရေး နှီးနှောဖလှယ်ပွဲကို ၂ဝ၁၃ ခုနှစ် သြဂုတ်လ ၂၄ ရက်နှင့် ၂၅ ရက် နေ့များတွင် ဆီဒိုးနားဟိုတယ်၌ ကျင်းပမည်ဖြစ်ရာ အဆိုပါပွဲတွင် ဦးဆောင်ဆွေးနွေးမည့် မြန်မာနိုင်ငံသားများ အား ဖိတ်ခေါ်လျက်ရှိကြောင်း ဗြိတိသျှကောင်စီမှ အင်္ဂလိပ်စာ ဖွံ့ဖြိုးတိုးတက်မှု တာဝန်ခံ ဒေါက်တာခိုင်ဖြူထွဋ်မှ ပြောကြားသည်။
နှီးနှောဖလှယ်ပွဲ၏ ယခုနှစ် အဓိကအကြောင်းအရာမှာ'From Inspiration to Implementation: Emerging Opportunities in the ELT Classroom' ဖြစ်ပြီး မြန်မာနိုင်ငံရှိ အင်္ဂလိပ် ဆရာ/ဆရာမများ အနေနှင့် နိုင်ငံတကာမှ ဆရာများ၏ အင်္ဂလိပ်ဘာသာ သင်ကြားနည်းစနစ်များ၊ နိုင်ငံတကာ အင်္ဂလိပ်ဘာသာ သင်ကြားရေးနယ်ပယ်တွင် တိုးတက်ပြောင်းလဲမှုများကို လက်တွေ့လေ့ လာနိုင်ရန်နှင့် မိမိတို့နိုင်ငံအတွင်း ကျင့်သုံးလျက်ရှိသော အင်္ဂလိပ်ဘာသာ သင်ကြားရေးနည်းစနစ်များကို တင်ပြဖလှယ်နိုင်ရန် ရည်ရွယ်ခြင်းဖြစ်သည်ဟု သိရသည်။
ဗြိတိသျှကောင်စီ (မြန်မာ)မှ ညွှန်ကြားရေးမှူး Mr . Kevin Mackenzie က ''ဤနှီးနှောဖလှယ်ပွဲ၏ ထူးခြားချက်များမှာ ယမန်နှစ်မှ စတင်၍ မြန်မာနိုင်ငံ ပညာရေး ဝန်ကြီးဌာနမှ အရာရှိကြီးများ များစွာ တက်ရောက်အားပေးခဲ့ပြီး ပညာရေးဌာန ပြည်ထောင်စု ဒုတိယဝန်ကြီး ဒေါက်တာမျိုးမြင့်ကိုယ်တိုင် အဖွင့်အမှာစကားပြောကြားပေးခဲ့ခြင်း၊ မြန်မာ နိုင်ငံ အင်္ဂလိပ်ဘာသာ သင်ကြားရေး နယ်ပယ်တွင် အလွန်ထင်ရှား၍ နှစ်စဉ်ပရိသတ် ငါးရာကျော် တက်ရောက်သည့် ပွဲဖြစ်ခြင်း၊ ယခုနှစ်တွင်လည်း ပညာရေးဝန်ကြီးဌာန မှ အရာရှိကြီးများ၊ ပါမောက္ခများနှင့် သင်ကြားရေးဝန်ထမ်းများအပြင် အပြည်ပြည်ဆိုင်ရာ အစိုးရမဟုတ်သော အဖွဲ့အစည်းများမှ လည်း တက်ရောက်ကြဦးမည်ဖြစ်သည်'' ဟု ဆိုပါသည်။
ဗြိတိသျှကောင်စီ (မြန်မာ)မှ အင်္ဂလ်ိပ်ဘာသာသင်ကြားရေးဌာန ညွှန်ကြားရေးမှူး Mr David Maynard ကလည်း ဤပွဲတွင် လာရောက်တင်ဆက်ကြသော အလုပ်ရုံဆွေးနွေးပွဲများအားလုံးသည် လက်တွေ့အသုံးချနိုင်ရေးကို ဦးစားပေးပြီး သီအိုရီများကို ရှင်းလင်းတင်ပြသည့် ဆွေးနွေးပွဲမဟုတ်ကြောင်း ပြောကြားသည်။
အဆိုပါပွဲတွင် အလုပ်ရုံ ဆွေးနွေးပွဲပေါင်း (၅ဝ)ခန့် ပါဝင်မည် ဖြစ်ပြီး နှီးနှောဖလှယ်ပွဲ၏ အဓိကအကြောင်းအရာကို နိုင်ငံရပ်ခြားမှ ပညာရှင်တစ်ဦးက အဖွင့်သဘော ဦးဆောင်ဆွေးနွေးခြင်းဖြင့် စတင်မည် ဖြစ်ကာ အလုပ်ရုံဆွေးနွေးပွဲများကို ဦးဆောင်ဆွေးနွေး မည့် မြန်မာနိုင်ငံသား အင်္ဂလိပ်ဘာသာ သင်ကြားရေးပညာရှင်များကို ဖိတ်ခေါ်လျက်ရှိပါကြောင်း၊ အဆိုပါ ဖိတ်ခေါ်လွှာများကို http://www. myanmar-network. net မှ ရယူနိုင်ပြီး conference2013@mm. britishcouncil.org သို့ အီးမေးဖြင့် ၂ဝ၁၃ ဇွန်လ ၁၇ ရက်မတိုင်မီ ပြန်လည်ပေးပို့ရန်နှင့် ဦးဆောင်ဆွေးနွေးရန် ရွေးချယ်ခြင်းခံရသူများကို ဒေါက်တာခိုင်ဖြူထွဋ်မှ ၂ဝ၁၃ ဇွန်လ ၁၅ ရက်မတိုင်မီတွင် အကြောင်းကြားပေးမည်ဖြစ်ကြောင်း သိရသည်။
